ОшМУнун психология адистигинин студенттери эл аралык конференцияга катышты

Anasayfa Haberler

ОшМУнун психология адистигинин студенттери эл аралык конференцияга катышты

2021-04-19 / 6954 / 11:04:18

Бүткүл дүйнөлүк ден соолук күнүнө карата Польшанын Бы́дгощ шаарында жайгашкан Жогорку экономикалык мектеби жана Орусиянын Забайкалье мамлекеттик университети тарабынан эл аралык онлайн конференция уюштурулду.

Онлайн иш-чарага педагогика, медицина, дене тарбия, психология жаатындагы илимпоздор жана Чехия, Польша, Орусия, Казакстан, Монголия жана Кыргызстандан студенттер катышты.

ОшМУнун педагогика, психология жана дене тарбия факультетинин психология адистигинин 3-курсун студенти Нураим Султанова “Кыргызстандагы майып балдардын психофизикалык ден-соолугунун көйгөйлөрү” деген темада баяндама жасады. Ал эми 2-курстун студенттери Жазгүл Маматова менен Акылай Тилебалдыева “Бала бакчанын үй-бүлөлүк көйгөйлөрдөгү ролу”, Айназик Абдуллакимова “Майып балдардын психофизикалык ден-соолугу” деген темаларды ачып беришти. Жыйынтыгында студенттерге жана илимий жетекчисине сертификаттар тапшырылды.

“Конференцияда абдан актуалдуу маселелер козголду. Өзүнүн баяндамалары менен катышкан студенттерде илимге болгон кызыгуу артты десем болот. Мындан сырткары Эразмус+ программасы аркылуу студенттерди академиялык мобилдүүлүккө чыгаруу аракеттерин да көрүп жатабыз”,-деди студенттердин илимий жетекчиси философия илимдеринин доктору, психология кафедрасынын профессору Асылбек Эшиев.

Конференция мектеп жашына чейинки балдардын ден-соолугу жана билим берүү маселелерине арналып уюштурулду.

Конференциянын шилтемеси: https://www.youtube.com/watch?v=6OtGAh8dQSs