Студенттер аскердик даярдык боюнча күч сынашты

Anasayfa Haberler

Студенттер аскердик даярдык боюнча күч сынашты

2021-05-27 / 8447 / 03:05:56

ОшМУда Кыргыз Республикасынын Куралдуу күчтөрүнүн түзүлгөн күнүнө арналган колледждер арасында мелдеш уюштурулду.

Мелдешке окуу жайдагы STEM инновациялык, Финансы-юридикалык, Эл аралык билим берүү программалары жана Теология колледждеринин командалары катышты. Катышуучулар аскердик саламдашуу, саптык элементтерди аткаруу, салтанаттык жүрүш менен өтүү, ыр менен өтүү, АК-74 куралын чачуу жана чогултуу, команданын атын коргоо сынактарында мелдешти.

Жыйынтыгында Финансы-юридикалык жана STEM инновациялык колледждеринин командалары 1-орунду ээледи. Ал эми 2-орунга Эл аралык билим берүү программалары жана Теология колледждеринин командалары татыктуу болду.

Мелдешти аскерге чейинки даярдык предметинин окутуучусу, подполковник Жуманазар Самидинов демилгелип өткөрдү. Максат КРдин Куралдуу күчтөрүнүн иш-аракеттерин даңазалоо, студенттердин ортосунда достук мамилени чыңдоо, мекенге болгон сүйүүсүн арттыруу.

Кыргыз Республикасынын Куралдуу Күчтөрү 1992-жылдын 29-майында Советтик Армиянын республика аймагына жайгаштырылган бөлүктөрү анын карамагына өткөндө түзүлгөн. Бүгүнкү күндө 29-май Куралдуу күчтөрдүн күнү катары белгиленип келет.