Ар улуттун жаштары ОшМУда өз маданиятын даңазалашты

Башкы Жаңылыктар

Ар улуттун жаштары ОшМУда өз маданиятын даңазалашты

2025-04-08 / 6588 / 05:04:05

Бүгүн, 8-апрелде ОшМУда “Дүйнө элдеринин маданияты” кароо сынагы өттү. Ага окуу жайда эмгектенген, билим алып жаткан башка улут өкүлдөрү жана мобилдүүлүк боюнча келген студенттер катышты.

Сынакта катышуучулар улуттук тамак-аш, кийим, музыкалык аспаптар, макеттер жана башка маданий-тарыхый баалуулуктарды көргөзмөгө коюшту. Андан соң ар бир улутка тиешелүү бийлерди бийлеп, улуттук ырларды аткарып, улуттук музыкалык аспаптарда ойношту. Ошондой эле театрлаштырылган көрүнүштөрдү тартуулашты.

Жыйынтыгында комиссия тарабынан жеңүүчүлөр аныкталды. Мыктылар 1-2-3-даражадагы дипломдор жана акчалай сыйлыктар менен сыйланды.

Сынак ар улуттун улуттук маданиятын, тамак-ашын, салтын, кийимин, тарыхын, искусствосун, руханий баалуулуктар чөйрөсүн даңазалоо максатында уюштурулду. Мындан сырткары көрүүчүлөрдү ар улуттун маданияты менен түздөн-түз таанышуусуна мүмкүнчүлүк түзүү, элдер арасында бир туугандык биримдикти жана ынтымакты бекемдөө болуп саналат.