Профессор Абдугани Абдурасулов эл аралык форумда Азия өлкөлөрүнүн атынан мүчөлүккө кабыл алынды

Башкы Жаңылыктар

Профессор Абдугани Абдурасулов эл аралык форумда Азия өлкөлөрүнүн атынан мүчөлүккө кабыл алынды

2023-10-23 / 2330 / 11:10:00

ОшМУнун табият таануу, туризм жана агрардык технологиялар факультетинин ветеринардык медицина жана биотехнология кафедрасынын башчысы, айыл чарба илимдеринин доктору, профессор Абдугани Абдурасулов Кытайдын Хайнан провинциясында ушул жылдын 10-11-октябрда өткөн “Айыл чарбасы, тамак-аш коопсуздугу” боюнча Эл аралык форумга катышты.

Профессор Абдугани Абдурасулов форумда “Кыргызстандагы мал чарбасынын генетикалык ресурсу тамак-аш коопсуздугунун бир бөлүгү катары” деген темада презентация жасады.

“Бул форумдун алкагында жер кыртышын иштетүү, тоюттандыруу, тамак-аш азыктарын сактоо, даярдоо технологиялары боюнча маалыматтарды алдым. Бул өңүттөгү иш-аракеттерди өлкөбүздө жайылтуу маанилүү маселелерден экен. Уюштуруу комитетинин мүчөсү катары мындай иш-чараларды Кыргызстанда, ОшМУнун базасында да өткөрүү демилгесин көтөрсөм деп турам”,-деди Абдугани Абдурасулов.

Форумдун жыйынтыгында профессор Абдугани Абдурасулов Азия өлкөлөрүнүн атынан уюштуруу комитетинин мүчөлүгүнө кабыл алынды. Иш-чарага 47 мамлекеттен 300дөн ашуун адистер катышып айыл чарбасы, тамак-аш коопсуздугу боюнча көйгөйлүү маселелер талкуулашты.