ОшМУда студенттер үчүн бизнес-инкубатор ачылып, иштеп баштады

Башкы Жаңылыктар

ОшМУда студенттер үчүн бизнес-инкубатор ачылып, иштеп баштады

2021-05-14 / 8539 / 12:05:15

Буга байланыштуу окуу жайдын ректору Кудайберди Кожобеков, Интеллектуалдык менчик жана инновациялар боюнча мамлекеттик агенттиктин директору Динара Молдошева, Кыргызпатентке караштуу Мамлекеттик интеллектуалдык менчик фондунун башкы директору Жоодарбек Жумабаев катышкан иш-чара өттү.

Ректор студенттердин инновациялык идеяларын ар тараптуу колдоого даяр экендигин билдирди.

Иш чарада ийгиликке жеткен стартаптардын ээлери оздорунун бизнес пландары боюнча айтып беришти.

Бизнес-инкубатордо атайын билими бар тренерлер университетте май-июнь айларында стартаптарды түзүү боюнча студенттер үчүн окуу уюштурушат. ОшМУдагы бизнес-инкубатордо окуудан ийгиликтүү өткөн студенттер өздөрүнүн бизнес план, бизнес долбоорун түзүп “Стартап Кыргызстан” сынагына катышып, ар бир долбоор үчүн 200 000 сом утуп алуу мүмкүнчүлүгүнө ээ болот.

Университеттин алдындагы бизнес-инкубатордун ишмердүүлүгүнүн жана ачылышынын максаты - жаштардын ишкердик идеяларын жүзөгө ашыруу, уюштуруу жана студенттерди конкреттүү чөйрөлөрдө (маркетинг, продукцияны илгерилетүү, бизнести монетизациялоо ыкмалары, жарнама ж.б.) чыныгы бизнес технологияларына үйрөтүү.

2020-жылдын ноябрь айынан баштап, Кыргызпатент республиканын жогорку, орто жана кесиптик башталгыч билим берүүчү окуу жайларында стартап-акселераторлордун жана бизнес-инкубаторлордун иш тажрыйбасын жайылтуу максатында билим берүү мекемелеринин ортосунда сынак жарыялаган. Сынактын жыйынтыгында бизнес-инкубаторлордун практикасын жүзөгө ашырууга талапкерлигин көрсөткөн 36 университеттин ичинен 11и тандалып алынган. Алардын ичинде ОшМУ бар.

Бизнес-инкубатор - бул өнүгүүнүн бардык этаптарында: идеяны иштеп чыгуудан баштап коммерциялаштырууга чейинки жаш ишкерлердин долбоорлорун колдогон уюм.